因為扮代表亂噏六四搞到民望插水嘅煲呔，自從豬流感疫情喺學校擴散，由佢趕返香港親自宣佈停課嗰一刻開始，佢明顯情緒高昂咗好多，噚日仲高調蒲頭，去外國記者會演講，先搞爛gag玩自嘲，繼而瞄準近日正在升溫嘅正生書院事件，sell溫情話自己都係父親，呼籲大家包容接納，點知當被人問到願唔願意喺禮賓府設立戒毒設施時，佢又縮骨咁話比較困難，因為嗰度係古蹟喎。
叫梅窩居民畀條生路
煲呔噚日以保育為題演講，一上講台就先搞爛gag，話自己心情好興奮，因為現場座無虛席，唔似上次佢喺立法會答問大會時講嘢，搞到一半人離場。佢講緊嘅係，上次喺立法會講六四時提出見利忘義兼代表香港論時，泛民議員拉隊離場一事。懶幽默咁玩自嘲，可見煲呔呢幾日啲自信開始返番嚟。
煲呔跟住就入正題，分享自己細個喺外國記者會附近一帶成長，仲話「香港是我家」之類。但講到尾段，煲呔就突然好凝重咁，話佢呢兩日睇咗啲新聞報道，另外有啲嘢想講，又話呢件事觸動佢嘅內心，跟住就望住一早準備好嘅講稿，發言話佢好關心正生書院事件，又話自己都係為人老竇，唔想子女吸毒，叫梅窩居民畀班浪子回頭嘅年輕人一條生路咁話。現場觀眾唔少都係洋人，但煲呔講完英文仲要用廣東話噏多次。
點知有現場嘅外國記者唔畀面，問煲呔願唔願意喺自己個禮賓府花園整個戒毒中心，煲呔回應話，咁做就比較困難，因為嗰度係古蹟，唔可以立亂「豎立啲嘢」，但又話戒毒設施擺喺市民嘅居所附近，係市民應該做嘅「最低限度犧牲」。政府新聞處都做足準備，搵人落場拍低煲呔照稿讀回應正生書院呢一幕，跟手擺上網，但呢段洋人玩嘢對答，就梗係唔會喺官方途徑睇到啦。
正生書院呢單嘢咁熱，疑似下屆特首候選人唐唐遠在珠海亦忍唔住隔空回應，話對事件深表關注，又話對年輕人誤墮毒網感到惋惜同傷心，叫社會包容，共同努力幫啲青少年脫離毒網，等佢哋重新融入社會咁話。
正生呢單嘢爆發以來，個個高官都義正詞嚴咁叫啲梅窩居民包容，八方都認為居民應該包容，但諗深一層，正生呢單嘢造成今日咁嘅局面，唔通政府真係一啲責任都冇？
mailto:[email protected]