左派紅人劉迺強無情情喺7.1前夕聯同佢嘅親中老友草擬「香港再出發宣言」，一味肉麻地唱好中國，話愛香港就唔可能唔愛中國，愛國就係愛實質上代表中國嘅中華人民共和國，驟眼睇落仲以為係官方喉舌新華社嘅宣傳稿㖭。
聯署叫「七一齊上街」
一班網民睇唔過劉迺強呢種肉麻當有趣嘅洗腦方式，噚日開始惡搞佢哋個網站 http://www.hkrestart.net，大舉殺入去留言板要求平反六四同呼籲7.1上街。網站管理員一度留言叫大家唔好再搞破壞，可惜未能撲熄網民發揮創意嘅慾望，最後惟有喺傍晚時分關閉留言區。
你有張良計，我有過牆梯，留言區網民止步，即時轉戰聯署區再玩過。佢哋諗咗好多別出心裁嘅名字，有人叫做「草泥馬」，有人叫做「民主」，玩嘢成份相當明顯。好多人趁機向有份簽署「香港再出發宣言」嘅行會成員梁振英發炮，以署名「涼薄英」同「梁震驚」表達不滿。
其實要中國同香港有前途，自必然要平反六四，唔少網民寫下「平反六四」；有網民更趁機寫低「香港再出發，七一齊上街」，劉迺強唔知會唔會響應。