做立法會主席後被迫「封口」，甚少機會表演辯才嘅民記曾鈺成，噚日難得被問到佢點睇早排民記新副主席張國鈞，早前喺電台電視節目一舉成名，發表「北極企鵝多」偉論，即時表演辯才反插傳媒，話「記者都會寫錯字」，咁係唔係唔應該做記者，仲叫大家唔應該對呢位張副主席「過份苛責」，認為唔少人都講錯嘢，又話唔少立法會議員同讀者都唔知北極係咪真係「人少企鵝多」，包括埋佢自己。
「我哋成日都講錯嘢」
曾鈺成又話，唔少人掛住笑呢位民記新副主席嘅「企鵝論」，「忘記佢說話嘅道理」，認為咁樣真係好唔值得，呼籲傳媒唔應該擴大呢種文化。曾主席又話，其實早前已經同班新人開班，講到教佢哋發言前要多做研究，就算政黨研究部準備好發言稿，發言前每一字每一句，都應該自己搵番原文睇睇，詞語睇唔明就要查到明先好用，認為民記日後培訓要加強，但就話明唔排除日後會繼續有人講錯嘢，「我哋成日都講錯嘢㗎啦」。