轆Book：Mini眉目傳情

一個老公，肯請幾日假親手將三千幾粒水晶，逐粒逐粒黐成BlinkBlink生日小車；又有個老公，花幾個月時間將部Mini拆骨重組粉飾，再四出搜羅精品小物，打造全Pink老婆生日大禮。老婆仲唔感動死？未夠？再要加多兩錢肉緊，頭燈嚟副「長睫毛」，又可以「雙目半閉」扮性感，實行要先嚟招眉目傳情！

記者：梁美甜
攝影：陳陶鈞
鳴謝：Minipit（23641666）

紅粉PinkPink　變臉貴過車價

車主同老婆大人都係舊Mini迷，老婆係PinkPink粉紅忠實支持者；老公就係高要求車迷，於是乎為咗搵部靚仔又企理嘅舊Mini已經花去不少時間，最終喺錦田車場搵到部白底黑頂零手舊Mini。再花半年時間攞返去寶馬廠重新噴油維修。老公要求之高，係要廠方將成部車拆開晒，裏裏外外噴上閃閃的珍珠粉紅色，細緻到連裙邊輪拱內側位都噴勻，再換上襯色皮椅及親自搜羅嘅各種粉紅飾物。結果，變臉費同車價有得揮。不過，生日禮物亦變成結婚禮物。
老婆開心不在話下，最誇張係老婆每日出入屋企之前，例必繞過去睇過呢部PinkPink車仔至安心，每星期例必出巡一回至高興，前提係，由老公揸喎！羨慕！

■變臉前咁嘅樣，十足睇整容廣告。

■全個內櫳以粉紅及白兩個色調粉飾。

■加長睫毛般嘅眼眉燈罩，即時電力十足。

■車門鋪絨飾再加別致手掣。

■加裝咗音響系統，唔係齋得個可愛樣㗎。

■粉紅間白雙色皮椅配老婆至愛Kitty咕。

■後鏡一樣有粉紅Kitty飾邊，好少女。

紫耀BlinkBlink　性能都Upgrade

同樣係送予老婆作生日禮物，無話拆開要砌又或者重新噴油，但付出嘅心思一樣毋庸置疑，點解？有幾個男友或者老公肯花幾日時間逐粒閃石黐，黐勻中控面板同波棍附近，大大話話都有幾千粒。淨係閃爆都未夠，性能就要Upgrade變火爆。舊Mini迷普遍都鍾意Upgrade性能，於是搵埋朋友幫手，專程由英國訂購舊Mini零件返來維修改裝兼夾提升性能。單係想像Darling捧住幾千粒水晶逐粒砌上面板嘅畫面，相信任何一個女人都一定感動到暈，冧死！

■連波棍頭及波箱面板都一樣鋪滿閃石。

■呢招「美目半閉」夠性感。

■仿鈦合金輪圈，唔閃，不過型。

■單係面板都過3,200粒水晶閃石。

■尾窗都有閃石Logo。