越嚟越多專家同學者相信，全球經濟似已見底仲有復蘇迹象，不過金融海嘯源頭嘅美國樓市仍未見起色，賣家售樓無門，幫業主將間屋以獎券形式出售嘅網站就乘勢興起。
唔少美國業主希望賣樓，但就冇乜買家承接，就算有人願意以較低價接貨，到交易時都因做唔到按揭而告吹，業主想甩手就要動腦筋。美國有網站串連業主同NGO（非政府組織）合作，以層樓做獎品，出售獎券集資，等出售一定數量獎券後，就以評估價格購買該單位送畀中獎幸運兒，餘額捐畀NGO。
其中一名依靠獎券去放售嘅賣家MilesBrannan，佢經營地產經紀業務，喺佛羅里達州有間豪宅，設施包括睡房同浴室各6個。佢喺05年以240萬美元（1870萬港元）購入，現時估值只得140萬美元。樓市陷入谷底，令佢生意出現困難，要大屋搬細屋。今年4月佢開始喺拍賣網站Floridaluxuryauctions.com出售獎券，每張10美元，至今已賣出2萬張，目標係年底前賣出30萬張、總值300萬美元嘅獎券。佢話扣除按揭，會將所得捐畀一間NGO。業主選用非正式途徑賣樓還債，多少反映美國樓市仲未掂。