上月SONY隻《inFamous》唔知大家打爆咗未？可能好多人唔明點解班鬼佬咁鍾意整啲又暴力、玩法又激似《GTA》嘅Game，冇日本仔咁意念行先，其實同佢哋嘅社會文化有關；今次呢隻《Prototype》同樣重視自由行動，畀空間大家去執行任務，而最過癮係主角擁有改變基因嘅異能，唔單止將隻手變成利刀劈友，最狂係無論平民、怪獸、軍隊甚至飛機大炮都任你宰割，忠奸不分，為求自保真係乜都夠膽做！
文：陳福榮
喪屍病毒灑遍紐約
由當今全球首席遊戲商ActivisionBlizzard旗下子公司RadicalEntertainment研製約三年嘅《Prototype》，繼喺E3披露終極影片後，近日終於推出市面，贏得唔少機迷支持。
呢間Radical向來主力做啲版權作品，《古惑狼》、《變形俠醫》同《阿森一族》都算水準不俗，而呢隻意思可解作「原型」，似足《GTA》動作遊戲，講述任職生化研究企業嘅AlexMencer被委派去運送一份病毒樣本，途中意料之外地被伏擊身亡，點知俾啲病毒「上身」仲復活埋，從此擁有強大異能，便利於應付遍佈全紐約想置佢於死地嘅喪屍同軍隊。
當然佢仲有埋《Bio》及《MGS》嗰種宿命對決，Alex最後要面對嘅居然係同因病毒而能力超強嘅「母體」，仲有全身防毒裝置嘅超級生化狂徒「專家」，難聽啲講真係炒盡天下名作點子於一身。
硬搶坦克直升機開片
既然開宗明義講到佢咁有《GTA》成份，睇吓周圍嘅高樓大廈、以主角身後視點四處殺敵和角落頭嘅任務提示地圖等，就知佢喺主線故事之餘有N個副任務俾你搞嗰種開放式世界，100%全破所需時間絕對唔嘢少。
不過主角Alex並唔係蠱惑仔，唔會隨街搶車做世界，反而往往會俾追殺自己嘅重裝甲坦克同直升機圍剿，因此要以其人之道、還治其人之身，做低駕駛者以作全面反攻。
當然，有睇開戲或者玩過《Bio》類遊戲，就知病毒圍城唔會只有低B喪屍任你宰割，揸機關槍小組式行軍嘅軍佬算係有啲麻煩，但更勁揪仲有異常巨大化、設有多個變種嘅獵食者；手無寸鐵真係咪諗住辣㷫佢哋，學蛇叔運路行避得就避好過，唔使殺晒所有攔路卒，始終通過到任務就OK。
殺戮方法層出不窮
唔單止以寡敵眾，仲會隨時撞正獵食者同飛機大炮，就算Alex自己變埋攻守能力高於常人嘅半人半喪屍都唔夠打！幸好呢種病毒令佢擁有可改變身體各部位外形嘅特性。
簡單而言，Alex跑得快、跳得高，都唔確保殺得晒班喪屍，通過基因變化雙手變成長達6呎嘅利刀，千刀萬剮冇人能擋；類似「狼人」咁左右手長出利爪；亦可變尖刺插落地底再兜番上嚟，唔使埋身肉搏；仲可伸長成鞭，連直升機都打低。呢啲只係普通招，佢有一款超必係全身伸出大量尖刺，當正箭豬咁插盡所有敵人，殘忍程度比得上古代嗰啲拷問刑具，保證打到血流成河。
Profile
機種：XB360、PS3、PC
開發：Activision/RadicalEntertainment
類型：ACT
價錢：$370（XB360）、$400（PS3）
