香港政界有唔少擦鞋仔，特區政府一直卻之不恭，仲好鼓勵呢種「創意工業」，招攬佢哋加入諮詢委員會繼續唱好，點知真正用勞力擦鞋人士嘅待遇竟然同呢批口水擦鞋佬有天淵之別，一班喺中環擺檔十幾年嘅擦鞋匠近期先後被食環署趕盡殺絕，唔畀再開檔擦鞋。公民黨余大狀對政府大細超對待擦鞋匠都睇唔過眼，號召中環友喺6.18、今個星期四下午1點，齊齊到中環戲院里排隊擦鞋，證明政府同市民一樣需要「擦鞋」。
抗議食環署迫害擦鞋匠
特區政府一方面希望小市民自力更生，唔使靠綜援過活，與此同時又對啲低技能人士趕盡殺絕，而且連幾十歲老人家都唔放過，確實天怒人怨。好似喺中環美利道天橋旁擺檔十幾年嘅擦鞋匠李伯，雖然年過70，都寧願自食其力日日擦鞋唔攞綜援，點知慘遭食環署連番票控阻街兼無牌經營。
余大狀知道後曾經要求當局法外開恩，點知政府部門無動於衷，好彩社會上唔係個個都係敗類，仲有好多有心人。有個喺佐敦開舖嘅老闆得悉李伯情況，透過余大狀建議李伯過海到其店外開檔，萬一食環署掃蕩亦可入店避鋒頭，但係李伯話中環多熟客，堅持自力更生，其志可嘉。
查實李伯嘅情況唔係獨一個案，中環戲院里幾位擦鞋匠一直受到食環署壓迫，其中一個擦鞋匠劉永明擺檔16年，由於學歷低，擦鞋係唯一謀生技能，好想獲發牌照安心搵食，唔想靠政府供養。
余大狀近日喺facebook呼籲有心人，尤其是附近返工嘅西裝友幫「腳」，今個星期四即係6.18中午1點鐘食飯時間，齊齊去到中環戲院里幫襯擦鞋，一嚟可以擦到對鞋立立令，二嚟又可以支持吓呢班被迫害嘅擦鞋匠。
事實上呢班擦鞋匠嘅檔口面積唔大，又冇四出招攬生意，相信唔會阻塞通道或者滋擾行人。而且呢班擦鞋匠已經係戲院里嘅旅遊景點之一，趕絕佢哋等於打擊特區旅遊業啫。八方都同余大狀一樣，希望當局唔好只許州官擦鞋，不准百姓搵餐晏仔食。
mailto:[email protected]