港股成功衝破19000點大關，再創今年新高，上周共上升210點。由3月9日（低位11345）開始的升市，已歷時3個多月，以上周五高點19161計，升幅亦已達68.9%，大市好明顯已進入尋頂階段，但呢個過程會相當反覆，時間亦好難掌握。
恒指尋頂，上升目標係19700至20200水平，大市更偏向個別發展。市場尋寶，由上而下，由大到細，逐步擴散，大落後的股仔，會繼續被發掘，被追捧，特別係有消息、有憧憬同超抵買嘅，升幅可以好誇張。
英皇鐘錶珠寶（887）就係其中一隻超抵買股，近日開始有異動，上周四收0.325元，升8.3%；上周五升後調整，但尾市高收，再升3%，走勢已呈現重大突破，第一個上升目標係0.405元。
英皇鐘錶去年7月21日上市，招股價0.43元，上市後高價0.61元，其後受大圍影響而急挫，一度低見0.135元。去年底短短幾日內由0.16元飆上0.31元，大升近倍。一有資金埋位，此類大落後股升勢可以好急。
過去大半年，英皇鐘錶走勢形成一個大圓底，近日在圓底頂部0.31元水平整固完成後，再發力上衝，顯示長期收集已完成，以大圓底形態衡量，目標係0.48元。
集團以腕錶及珠寶首飾零售業務為主，經銷約30個國際名錶品牌，並售賣自家設計的珠寶首飾。08年（12月年結），營業額18.42億元，升18%；毛利5.14億元，升47%，毛利率由22.4%上升到27.9%；股東應佔溢利2.22億元，升39.9%。
去年業績續有增長
集團零售網絡集中在旅遊及高端市場，目前在香港及澳門分別有11間和4間門市；去年拓展內地市場，在北京設立中國總部，並開設4間門市，兩間在上海、一間重慶及一間天津。今年計劃續開分店，在尖沙嘴一歷史建築物內開設的新門市，佔地達1.7萬平方呎，另外內地開店亦會加快進行。
去年金融海嘯冲擊全球經濟，但英皇鐘錶未有受影響，業績繼續有增長，今年中港兩地股市和樓市回暖，購買力陸續恢復，集團應會受惠，估計09年盈利可達3.1億元，每股盈利6.8仙，以0.48元目標價計，預測PE只係7倍，仍屬吸引。
郭兆誠