鏹水彈狂徒一日未落網，市民一日行過旺角都會心驚膽跳，唔知幾時會中招。一班泛民中人好似卿姐、毓民、毛孟靜同廖成利等，為咗7.1都唔驚得咁多，噚日下晝就喺鏹水彈橫行嘅旺角行人專用區現身開壇，呼籲市民7.1維園見。
講者之一嘅張國柱平時斯斯文文，噚日講到政改諮詢就超勞氣，話政府經常都呃人，真正支持普選嘅人都係要靠7.1上街。唔少市民都同泛民中人一樣膽大包天，唔係話佢哋唔驚畀鏹水彈淋中而圍觀，而係以掌聲表明會同泛民聯成一線，齊齊向北大人講出普選心聲。八方得知呢類7.1旺角街頭論壇陸續有嚟，睇嚟泛民中人都要提心吊膽多一陣。