以往禽流感肆虐，搞到好多人唔敢食雞，家陣H1N1豬流感病毒已演變到人傳人，仲發生社區爆發，不過疫情未必關豬隻事，政府亦冇話要禁止生豬或豬肉入口，民眾亦照食如儀，可見豬肉在中國人的飲食文化佔重要一席。
豬肉股雨潤食品（1068）最近在某證券商投資者會議表示，今次疫情對公司業務未有影響，5月份屠宰業務更取得按年逾四成增長，更認為生豬價格已見底。
有機會見10元
由今年初起，生豬價格已累跌近三成，加上6、7月份又係需求旺季，產生托價效應。如果豬肉價格下半年回升，當然會惠及雨潤，因屠宰、冷鮮肉等上游業務佔該公司盈利來源近80%。
雨潤股價在4月一度低見8.80元，但好快就重上10元水平，5月下旬急升，今個月初高見12.90元；可惜升得急，亦跌得快，上周五一度跌至11.36元，收報11.62元，下跌1.2%。
技術上，雨潤短線高位料已見，後市調整應未完，或將下試10元水平，暫不宜沾手，等股價企穩10元再諗。
方星俠