銀行未來要實施紅綠燈，即係實行有如禽流感應變策略人雞分隔，將來紅簿仔有自己一條龍，而投資產品銷售又有另外一條專人打理嘅戰線，將來有咩損手爛腳，再無得賴俾人「坤」，皆因牛唔飲水唔㩒得牛頭低。預咗銀行生意難做，所以狂谷樓按，從來只會有人怪地產代理「坤」人買樓，唔會有人賴銀行「坤」人借樓按，呢瓣生意安全好多。
本地銀行客已變成受保護動物，連基金公司銷售人員都話早幾個月好多外國投資者已經返晒嚟買嘢，惟獨香港客仲驚緊，對任何投資產品都仍存戒心。市場所見，近期市況轉旺，有唔少散戶落個盤嘅速度仲快過買棵菜，之但係入到銀行，就反而驗屍咁驗啲文件同埋條款，睇完晒啲條文仲要問清楚先至肯買些少，歸根究柢，都係「一朝被蛇咬、三年怕草繩」。
據知有迷債苦主，過去幾個月已成功化悲憤為力量，積極把剩餘資金入市炒上落，仲話根本唔難揀股，反正國策話晒畀你知每日炒啲咩板塊，已經差唔多翻晒身。經一事、長一智，原來親力親為更實際。
即食麪消費與經濟同步
講到國策，最具持續性唔需要點樣催谷嘅一瓣肯定來自飲食，皆因民以食為天。中國仍然係發展中國家，與經濟增長最同步者反璞歸真都係嗰碗即食麪，有調查話中國內地人均年消費34包方便麪，排名世界第4，而目前韓國人、印尼人及日本人之人均消費為80包、52包及50包。
中國內地方便麪總產量及消費量分別佔全球5成及3成，每年產量近500億包，生意額講緊400億元人民幣，年增長速度10-15%，龍頭嘅康師傅（322）今年第一季於中國內地方便麪市場佔有率達51.4%，首季方便麪銷售額5.88億美元，同比仍有11.9%雙位數增長，福滿多品牌搶攻中、平價麪市場，「香脆麪」有香港都搵唔到嘅蛋烤紅柿口味，實行從飲食文化出發，小小一包麪都可以成為大生意。
至於內地排於其後者強勢品牌還有華龍、統一、白象、五谷道場及錦豐，市場佔有率通通被前者拋離，當中被認為唯一有條件與康師傅一較高下者只有統一，統一中國（220）去年於內地方便麪銷售收入達22.55億元人民幣，康師傅1992年開始生產即食麪，統一則生產咗30幾年，無理由輸畀人。
胡孟青