中金首席經濟學家哈繼銘（圖）究竟會唔會好似傳聞咁話，會入人民銀行做新司局負責人？不過只聞樓梯響，主人翁一直都冇回應過。當事人噚日現身一個論壇，大家以為可以有答案，點知呢位解釋經濟問題時，口若懸河嘅經濟學家，講到自己嘅去向就欲言又止。
哈繼銘噚日參加博鰲．21世紀房地產論壇，《地產中國網》一名記者見佢蒲頭，即時上前問佢過檔人行嘅傳言，點知哈繼銘只係講咗句：「這還是不確定的事。」
查實早喺3月時，已有傳媒打過電話問佢，佢當時話：「假的真不了！真的假不了！」華華都有寫到，仲以為佢故弄玄虛，今次佢講到自己都唔肯定，唔通單傳聞仲未成事？
不過《地產中國網》引述接近中金人士話，哈繼銘馬上就要喺人行任職，而接替哈繼銘喺中金嘅人選，好可能係上年過檔中金、家陣擔任董事總經理嘅梁紅。