郭氏兄弟家族風波暫時告一段落，大K郭炳湘雖然由主席轉為非執行董事，但都非常活躍，近日足迹去到重慶同上海，考察長江流域嘅發展潛力。
大K今次係用「世界華商聯合促進會重慶高層考察團」團長身份率領超過30名香港政商代表考察。身為全國政協常委嘅大K大駕光臨，重慶市都不敢待慢，市委書記薄熙來親自接見考察團，仲力sell重慶係內地發展最快城市，歡迎港商投資。
考察團之後轉到上海，其中參觀景點就係大K當年以新地主席身份拍板喺浦東陸家嘴興建嘅國金大廈。舊地重遊大K梗係百般滋味在心頭，但無影響佢樂觀天性，呼籲香港保持競爭力同上海鍊過。