天氣唔好心情唔好，咁都有得懶？女人就有呢份特權喇！心情唔好唔想揸車，叫細姪女車我出街齊齊散吓心。不嬲都知細姪女鍾意開快車，之但係車快都要有一定技術同反應Support至得。佢凡入彎部車就好搖，有一下仲甩尾㖭，搞到我心狂跳，仲瞄見細姪女諗住踩Brake，忍唔住就即時嗌咗出嚟。「畀少少油扭左（預期車尾將甩方向）啦！」相信細姪女係未經思考而純粹跟我說話做。車甩一甩隨即就擺番跟方向盤一樣嘅指向。搵位停埋一邊至教細姪女，遇到呢類情況千萬咪踩Brake，一落Brake部車就會完全失控。「點解你識嘅？」經驗！而且大姨媽我上過高級駕駛課程都學到一招半式。部車會搖擺，好多時都係入彎時控制得唔好，又或者速度太快但勉強入彎所致，呢個時候本能會踩Brake，所以要反應快唔落Brake之餘，仲要加少少油，轉定軚去部車將甩嘅方向，部車甩完就會順軚歸位。一落Brake部車無動力同糾正時間，到時就真係飛出街失控喇。
文：大姨媽