市民不滿無記淪為CCTVB，抗議行動一浪接一浪，除咗有人喺無綫直播新聞時玩突襲，高舉「無線新聞、事事旦旦」標語，近日YouTube更湧現越來越多網民惡搞CCTVB短片，有網民更呼籲不滿TVB節目質素嘅市民，一定要去廣管局為TVB同ATV舉行嘅兩場公聽會表態。
首場公聽會禮拜五喺太空館演講廳舉行，市民可以就TVB同ATV續牌12年後嘅表現發表意見，據講對廣管局檢討免費電視牌照「起莫大作用」。
兩個電視台管理層都會出席，八方認為陳志雲、袁志偉同樂易玲最好親自到場，聽取廣大觀眾意見，相信對提高無記新聞質素、港姐佳麗水平都有幫助。