英格蘭對安道爾，大勝六比○，本先諗住英格蘭一定贏梗，想話落注，但打開《蘋果日報》體育版一睇，主勝賠率只係一點零幾倍，買嚟做乜呀，再睇讓球主客和賠率，有一點六五倍，幾好噃，但再睇真啲，原來英格蘭要讓四球，即係話贏四比零都只係打和，英格蘭一定要淨勝五球至掂，但英格蘭球員已經在世界盃外圍賽六戰六勝，呢場波只要射入一兩球就可以七戰七勝，啲球星會唔會繼續拚命射多幾粒呀？輕鬆取勝然後放假好過啦，經一輪「理性」分析，卒之都係慳番，費事下注，無謂押注一間廠嚟贏一粒糖。點知英隊絕不勒馬，贏得就贏，射入六球咁多，《蘋果日報》（六月十二日）體育版標題，「英軍正氣，大炒收爐」，左丁山不禁失笑，呢位編輯唔通中到正？呢啲係賭波式標題喎！
睇外電，仲有好笑之事，就係一位蘇格蘭人，竟然下注十三萬五千鎊（約一百七十幾萬港元）買英格蘭贏，收到嘅派彩只係十三萬五千六百七十鎊，即是贏咗六百七十鎊，賠率係1.00496倍，真真正正用重型機關槍嚟射死一隻蚊。用百七萬港紙嚟贏八千五百幾蚊，似乎有啲神經失常，連莊家Ladbrokes亦覺得不可思議。呢類賭波行為，好似儍儍哋，香港就唔慌有，明光社不如去蘇格蘭開分社，勸當地人唔好賭波！
足球博彩，以英超聯最為「正氣」，極少出現人情波之事，唔似得西班牙、意大利聯賽咁間中有奇妙賽果。不過下一季西甲賽事，皇馬對巴塞就非睇不可，皇馬借錢借到水浸眼眉嚟買C朗與卡卡，一星期內願意付出一億三千六百萬鎊，再加埋附帶使費，可能支出高達一億五千萬鎊，只係為咗兩位超級天王巨星唧，相信繼續要買中場與中堅嚟鞏固後防。皇馬花錢如流水，連《金融時報》都要以第二版大事報道，視之為世界大事。金融海嘯後遺症未除之下，皇馬顯然係借債製造泡沫，條數唔知點計，邊位做下季皇馬教練其實都無法承受壓力，用咁多錢而打唔贏巴塞嘅話，教練一定炒魷。講到尾，皇馬會要求更多電視轉播費，電視台要更多收看費，一路轉嫁下來，香港球迷唔多唔少要為C朗與卡卡嘅轉會費孭番多少飛。