豐德麗（571）既係超級現金牛，NAV折讓又極之吸引，係時候。豐德麗到上年底，揸住現金16.5億銀，債項2億銀，手頭淨現金高達14.5億銀，相等於每股1.17元。又豐德麗挨近5年低位，現價1.23元，最新NAV4.29元，折讓高達70%。即係話，豐德麗現價只係反映緊豐厚淨現金值，其他資產仲未喺股價度浮現出嚟。
再講，豐德麗家陣聯同星洲地產大孖沙嘉德置地旗下附屬，發展澳門星麗門，又集團旗下聯營麗展（488）揸住中環麗嘉酒店重建項目，同埋灣仔活道高級住宅項目。齋計後邊兩個項目，應佔樓面18.25萬平方呎。而呢兩個優質地段尺金寸土，中線增值潛力好爆炸。豐德麗NAV肯定唔係呢個價，折讓水位應該仲大。以豐德麗現價翻半番計，集團價見1.84元，目標價NAV折讓仍然高達55%，呢個折讓水位，比起好多澳門股，仍然係好吸引。
渝港折讓高達72%
渝港國際（613）最新NAV0.21元，現價（9.4仙）折讓55%，仲有唔錯折讓墊底。又渝港揸咗中渝置地（1224）11%或2.54億股。後邊中渝由3月頭到家陣，唔經唔覺大升咗4倍，為渝港增值咗近11億銀，相當於渝港每股0.115元，高過渝港現價。中渝越升越有，渝港家底受惠，大大水漲船高。連呢項增值反映，渝港NAV0.325元，實際折讓高達72%。渝港NAV折讓收窄番到56%，價見0.143元，現價講緊要翻半番。
錢雋