政客最愛曝光，民主黨副主席單仲偕唔做議員愛上潛水，噚日更帶隊落海，同黨友去到西貢海底執垃圾。水底垃圾無奇不有，玻璃樽、膠樽、窗框、鐵枝乜都有，單仲偕都話大開眼界。佢哋噚日總共執到31.5公斤垃圾上水，水底仲有無數咁多廢物，冇可能完全清理，希望大家高抬貴手，唔好將大海當做垃圾桶。
興趣班暫緩開鑼
單仲偕行下水禮，其實民主黨今年本來打算開辦潛水、品酒、游泳等逾300個興趣班，卻因為豬流感而臨陣取消。該黨總幹事陳家偉話，雖然諮詢專家意見後，認為可按計劃暑假開班，不過黨內評估後認為必須零風險，萬一有學員中招而傳播豬流感，民主黨就孭鑊，因此決定暫緩開班。
呢個興趣班大計據知由前副主席狄志遠牽頭，籌備一間以社企模式運作嘅新公司營運，透過各區議員辦事處招攬學生、中產家長參加，目標係兩年內自負盈虧，鴻圖大計係想透過興趣班擴大地區網絡。