《巾幗梟雄》入面，柴九哥有四奶奶陪伴行人生最後一程，心願已了，但現實中嘅柴九哥黎耀祥似乎就心願未了。一直聽聞祥仔心郁郁想添加一部開篷跑車，但就只聞樓梯響，原來係佢仲未揸定主意。本想再借其DreamCar保時捷畀佢試揸，推佢一把，點知佢話想試Jaguar。劇情峯迴路轉，一試JaguarXKR4.2，祥仔突然想棄開篷而取「獵豹」，咁結果會唔會好似《巾幗》劇情一樣，Jaguar就如海棠咁真正被娶入門，而保時捷就好似四奶奶一樣，愛在心中呢？
記者：許維雅
攝影：梁細權
柴九一角，成績如此彪炳，黎耀祥再下一城向全世界證明實力派嘅號召力。「入咗呢行咁耐，好明白天時地利人和嘅重要，好多嘢無得強求，家盡量將自己心態放喺一個好平穩嘅位置，唔會好心雄定下咩目標，keep住開工已經好好，亦唔會諗咩跳出去電影圈，我從來都唔嚮往，何況我都跳過出去啦。而且拍劇集帶畀自己嘅滿足感，係拍電影搵唔到，因為家睇電影嘅人真係唔多。拍劇有40幾點收視，300萬人睇你喎，街坊即時畀你嘅反應，係最直接又令我最開心。」
跑車係俠士嘅馬
要獎勵自己，觀眾嘅支持又點夠，一架跑車應該係最好嘅禮物。但對於過咗年少氣盛，不再強求嘅祥仔，點解咁堅持想買架跑車？「自己好鍾意車，買跑車係一種情意結，因為每個男人都應該有架屬於自己嘅跑車，好似以往買咁多靚車都係四門車，感覺始終係家庭車，而跑車就唔同，係真正屬於我嘅，成件事個人化好多，就好似俠士一定要有匹馬一樣。」祥仔兩父子出咗名感情好，兩仔爺最大娛樂就係睇CarShow，齊齊講車經，「佢唔係亂噏㗎，佢鍾意得嘅，就識分析畀你聽邊度靚，佢天生有啲審美眼光㗎。」作為使錢最後防線嘅黎太，指住自己揸嚟架Lexus插嘴：「次次睇親CarShow都好危險，成日會無端端就買咗架返嚟，呢架咪係唔覺意買囉。見阿仔話鍾意就買！」祥仔陰陰笑回應：「其實我都鍾意車嘅，有時賴個仔咁解啫。」
Classic&LongLasting
見佢兩公婆打情罵俏，又見祥仔一定要拉埋老婆上車試、問意見，恩愛程度真係羨慕死人。不過，面對JaguarXKR4.2呢架流線型獵豹，睇嚟最後防線都有機會失守。黎太一坐落司機位即興奮大叫：「好容易睇位喎！女人揸車好簡單，最緊要容易揸。同埋我好鍾意車尾，夠晒流線型，真係好靚，好過買開篷啦。」雖然呢架悍豹已經係07年款式，但對於平常心愛平穩嘅祥仔而言，已經唔會強求追新款，400匹馬力、500Nm扭力、手撥加減轉檔已經夠晒滿足佢。「外形的確好有型，幾英國Classic跑車Feel，好傳統款式，估唔到加啲Cyber嘢落去又出奇地襯喎！真係幾啱我，唔會好辣，傳統得嚟又有跑車嘅味道，加上歐洲車好襟睇，呢啲跑車款式感覺好LongLasting。年紀大咗，揸車會有幾快吖，呢架夠用喇。加上操控好易，Kickdown好快，畀少少油，都好去，呢架車真係無得頂！」反質疑佢唔買開篷嗱？「想變節喇！可惜我唔揸得黑色，次次揸親都出事，代理又得番架黑色。不如你幫我問吓有無經理車賣吖，紅色我都OK㗎。哈哈……」
麻甩佬的柴九哥
訪問當日，四圍都係工廠、地盤，祥仔所到之處，都有班麻甩佬同佢揮手打招呼，大叫「柴九哥」，甚至衝埋嚟搵佢影合照，對於呢班麻甩佬嘅熱情，原來喺祥仔心中，別有一番意義。「嗰班走埋嚟叫你嘅，唔係妹妹仔，係麻甩佬嚟㗎，我好珍惜佢哋對我嘅呢份感情。」
雖則麻甩佬Fans唔係個個有本事有，不過重點係，死心塌地撐硬「柴九哥」嘅，都仲有一班妹妹仔！
JaguarXKR4.2規格
引擎：4,196ccV8DOHC
馬力：400bhp/6,250rpm
扭力：560Nm/4,000rpm
傳動：6前速半自動波
0-100km/h：5.2秒
售價：$1,398,000
查詢：JaguarHK（25200989）