入獄雖然失去自由，但仍然可以享受懲教署優質服務，該署刊物《愛群》報道，署方今個月起逐步為在囚人士更換新款啡色膠拖鞋，舊款拖鞋有條腳跟搭帶，原意係冇咁易甩鞋，不過着上腳卻唔係太舒服，新款拖鞋唔用搭帶設計，用家穿着時更方便，鞋身亦較舊款柔軟，而且有更佳承托同吸震效能，該署話在囚人士會着得更舒適。據稱新拖鞋採用較耐用物料製造，有助減少更換次數，既環保又可減少更換拖鞋人力物力。一般人買新鞋係閒事，懲教署換鞋要成立專責工作小組，進行近一年研究檢討，諮詢專家意見再反覆測試、改良後，先落實採用新款拖鞋。
