呢排小藍好唔得閒，啲AV產品一窩蜂湧出巿面，好似全高清電視、高清數碼手提攝錄機、投影機等等，睇到眼花撩亂。三星好鬼進取，幾乎個個禮拜有新嘢出。最新嘅咪係全港首部2.1聲道立體聲揚聲器連超低音叭喇嘅netbook囉。
享受環迴立體聲
netbook都有Sub-woofer，玩埋重低音，真係估佢唔到。三星資訊科技產品總監Joseph話，舊年三星順應潮流推出第一部嘅netbook反應唔錯，今次咪再進一步打造一個超輕便嘅流動影院，「家啲年輕人都隨處睇戲同打機，想佢哋享受吓啲環迴立體聲滋味。」
Joseph話，部機對應到1080i嘅高清訊號，硬碟160GB，睇高清電影無難度；電池嘅使用時間有成10.5小時，好似坐一程飛機去澳洲，用部電腦睇兩、三套戲都冇問題。
流動影音越嚟越流行，AVConsultant嘅影音專家AlanLee話，好多人用notebook、MP3、MP4喺公眾場所睇戲聽歌都會插headphone，但有時被人掃到條線搞到部機跌落地都幾傷。佢話啱啱喺美國引入咗件創意小配件，叫做replug耳筒插頭膠管連接器，一邊插頭插住notebook，一邊插住耳筒，啲人打橫掃到條線，膠管就同插住notebook嘅插頭分離，唔會扯跌部機。