陳奕迅（Eason）前晚在會展舉行演唱會，老婆徐濠縈和因豬流感停課的囡囡康堤均有捧場。雖然Eason因之前在台灣個唱瞓身演出，引致聲帶沙啞發炎，被醫生叮囑戒煙及休息，但前晚黐了一臉羊毛黑鬚的Eason即使不時吞鬚，仍笑言因狂吸止汗劑high爆，毫不錫身盡情演出。
陳奕迅前晚在會展舉行「新城極品陳奕迅SAMEWRONGSIN音樂會」，全場爆滿，Eason的老婆徐濠縈和囡囡康堤均現身撐場，Swing及Mr.則擔任表演嘉賓。Eason以新碟的鬍鬚造型示人，卻幾次不小心吞了少許鬍鬚入口，至後半部份Eason開始忘我投入演出，又唱又跳，安哥後仍賴死不走，再多唱了3首歌才完場。
自薦做嘉賓
Eason除獻唱新碟歌曲外，還選唱了王菲的《開到荼靡》和黃家強的《麻醉》，他說：「好耐冇聽阿菲把聲，好掛住佢哋嘅歌，《麻醉》我好鍾意。遲啲我仲會做Beyond演唱會嘉賓。」
事後訪問時，Eason直認開場時表現拘謹，他說：「我黐咗成面鬚，全部係羊毛，好熱，我又怕甩鬚所以唔敢郁，為咗唔好甩鬚我狂搽止汗劑，因為狂聞所以好high。」問到康堤會否認不出黐了鬚的爹哋？他說：「佢會唔敢錫我，話拮拮，我見佢頭先睇騷顧住執紙碎，都唔係聽我唱歌。」
喉瘜肉發炎
Eason又透露由於之前在台北小巨蛋用力狂唱，令聲線沙啞，醫生指他不但喉嚨瘜肉發炎，甚至指他「燒埋個低音」。完騷後Eason坐保母車到銅鑼灣富瑤消夜，徐濠縈、康堤、蘇永康及女友和劉浩龍等已一早到埗，Eason拿着湯壺箭步進入酒樓，直至凌晨約1時才離開。由於徐濠縈和蘇永康的座駕同色同款，兩人上車前都先猶豫了一會兒，仔細看清楚才上車。
採訪：胡比、楊浩賢
攝影：黃文成、黃曉程