自從九一一之後，一啲香港中級寫字樓大廈加強保安。因為恐怖份子以飛機撞散咗紐約世貿雙子塔大廈，一啲「最高樓宇」被視為高危大廈，例如IFC與西九龍嘅ICC。IFC首創訪客要登記身份證，現在ICC雖未建築完成，已有投資銀行遷入，當然一樣做法。此日左丁山應邀到一間銀行訪問，坐的士到咗西九ICC門口，居然有穿着斯文嘅OL迎接，開車門，仲好禮貌過六星酒店門口嘅招待員，左丁山不禁受寵若驚。位OL開口問：「請問係唔係上摩根史丹利？」左丁山答：「唔係，你係摩根史丹利職員呀？」小姐答：「我係新鴻基職員。」嘩，大業主乜咁好招呼呀？步上電梯上咗一層，又有穿制服管理員迎候，帶到八樓一個櫃枱，招待員要睇身份證，發一張訪客卡，跟住問左丁山：「請問聯絡電話？」點解要講呀？左丁山話冇，要仄就請打電話到樓上銀行問一問。然後又有管理員帶左丁山搭智慧型電梯上銀行，總之有最少五個人見過左丁山，自己仲未入到，如果自己係周文耀嘅話，相信成棟大廈都知道「周文耀」到訪某某銀行，傳出去，有新聞可做。
夠晒禮貌，夠晒保安嘞，不過「擾民」啫！入到銀行見到賓架Ａ，老實不客氣咁同佢講：「嗱，呢間大廈夠晒氣派，呢度睇海景確係無敵，但如果你有外國名人貴賓（例如政要或大富豪）嚟搵你，喺樓下就畀人登記晒、嘜住晒啦，全無私隱，係VIP客戶大忌噃！」賓架Ａ眨眨眼話：「騎騎，真正VIP客戶會事先打電話嚟，我哋會派人在的士/汽車落客處迎候，直接帶佢哋上嚟，一定唔會畀下面登記佢哋嘅身份證。而且佢哋住在半島酒店，唔通帶埋護照出街咩！」
此言有理，但好多大廈過份緊張，例如中國銀行大廈喺去年奧運會之前，已實施登記身份證，有時見到招待員睇住張證猛咁打電腦，令人懷疑佢係唔係輸入訪客個人資料，如果係，會儲藏幾耐？有無侵犯私隱？私隱專員鄧爾邦律師能言善道，解畫冇得頂，議員咬佢唔入，左丁山好想請鄧專員注視，派人研究各一級大廈登記訪客身份證資料，有無濫用，有無侵犯私隱，有無規則畀大廈管理人員遵從。如有不肖人員與外人私通爆料，可能會釀成大件事㗎！