廉署收到嘅貪污舉報有增無減，人人做到氣咳，加上豬流感殺入社區，廉署推出為期半年嘅「健康工程三重奏」運動，即「多做運動」、「少吃歪糧」、「放開懷抱」，鼓勵員工鍛煉體魄。
呢個健康工程由廉署三頭馬車分別負責，執行處負責體能，前線員工要多做運動以最佳狀態執勤；防貪處就負責飲食，北角總部飯堂會推出健康午餐，處長歐陽呂妙群公開防流感牛蒡北芪杞子湯秘方，請員工飲湯；社區關係處就推廣健康精神，鼓勵員工積極面對壓力同逆境。廉署又向員工派發計步器，鼓勵日行一萬步，唔知廉政專員湯顯明會唔會check住員工有冇行足數。