小學、幼稚園停課，細路哥好似提早放暑假，開心到震，爸爸媽媽卻好閉翳，因為個豆釘忽然唔使返學，搵邊個照顧隻甩繩馬騮呢？有「可憐家長」電郵八方，話由於兩公婆都要返工，所以雖然幼稚園停課，都無奈要將四歲囝囝送返學，否則冇人照顧好弊，點知校方話根據當局指引，停課期間唔提供膳食，即係佢個仔返到學校都要捱餓，佢質問食衞局局長周一嶽，係咪要個細路自己「叮」飯食？定係要家長辭工湊仔？
TVB重播《係咪小兒科》
八方相信全港有唔少類似可憐家長為口奔馳，霎時間搵唔到人幫忙照顧細路，無計可施，不如送去食衞局等周一嶽搞掂佢，既然周局長話停課唔係放假，警告迪士尼唔好推出優惠搶客發疫症財，家長唔可以帶仔女隨處去，惟有交畀食衞局託管啦，如果周一嶽唔肯接收，就要求唐英年介入，難道司長忍心班細路吊吊fing？
美國漠視批評輸出豬流感，擺出強國風範，迪士尼有此強硬後台撐腰，又係香港旅遊業重要命脈，萬一入場人數受周一嶽言論影響下跌，八方恐怕周局長都擔當唔起，因此樂園噚日懶理高官壓力如常營業，據知其門如市，聽聞有高官更放假同囝囝囡囡一家人入場玩足成日，當周一嶽警告耳邊風。
唔係個個父母可以放假湊仔，去迪士尼又要使錢，八方估計大部份細路未來兩個星期都要留喺屋企發呆，TVB今次唔是但，好關心小朋友，翡翠台下周一起一連兩星期早上重播《係咪小兒科》，亞視國際台則延長播出教育電視。冇興趣睇電視，仲有其他娛樂，有遊戲機商火速推出優惠，憑手冊或學生證買遊戲機，可獲贈五款益智遊戲光碟，有個onlinegame則推出一個「大戰豬流怪」遊戲，市場觸覺十分敏銳。
得個玩字唔係辦法，上述「可憐家長」擔心仔女放假冇啖好食，好彩連鎖快餐店有體貼服務，即日起至下個月底叫外賣雞，送雞到戶時只要出示學生證就有88折優惠，市民商戶喺患難時刻發揮自救精神，外賣雞送到上門，家長唔使擔心子女餓親啦。
mailto:[email protected]