豬流感疫情擴大，不過今次形勢與當年沙士唔同，股海並無因而大插，恒指反而乘勢衝上19000，昨日最高見19161，但內地股市下半場腳軟，拖累港股升幅收窄，僅升98點，報18889收市。呢款形態再次證明，內地股市升跌直接影響港股表現。
內地近日公佈連串經濟數據，箇中好壞參半，好似內地出口連跌7個月，5月份同比下降26.4%，較4月份跌幅22.6%擴大，跌幅亦破紀錄。不過，今年首5個月城鎮固定資產投資就增長33%，純睇上述兩項數據，散戶一般會認為航運股唔掂，內房股則可能較值博。
內地樓市生態都幾怪，發展商新盤銷情雖好，但實情好多城市樓房空置率好高，都唔知係咩一回事。睇唔通內地樓市，只好睇多過炒。不過，受惠城鎮固投數據理想，昨日內房股亦見炒作，又令人睇到心郁郁。
其中以中國海外（688）及富力地產（2777）表現較搶鏡，華潤置地（1109）雖一度升至17.78元，之後卻掉頭回跌，失守17元，收市跌1.5%，報16.98元。華潤置地今年首5個月售樓收益達90億元，已完成全年銷售目標90%，集團估計今年盈利增長將優於去年。
華潤置地股價無理由咁曳，前陣子大升後回吐，兩度跌近20日線都可守穩，短線仍有機會挑戰今年高位18.24元，可伺機吸納，目標19元，以15.50元止蝕。
方星俠