仲記得《街霸3》初面世，成個格鬥遊戲界都未能掀起一股巨熱，反觀大賣靚畫、爽快感嘅《GuiltyGearX》成功突圍，一口氣推出多款續作鞏固地位，喺日本佢嘅影響力仲勁過《街霸》、《拳皇》；廠方為咗進軍高清界，利用類似理念搞隻《Blazblue》，舊年響機舖總算獲得一定好評，家移植至XB360、PS3等平台，賣點唔使講梗係足本1080p，同埋任你上網搵人挑機啦！
文：陳福榮
集Guilty大成再昇華
中文官名《蒼翼默示錄》嘅新世代格鬥作品《Blazblue》，成日用高清版《Guilty》嚟形容好似有欠尊重，但驟眼睇無論作畫、系統以至表達手法都同《Guilty》同出一轍，無他嘅都係同一個阿媽生嘛（製作人石渡大輔）。
講番系統，佢條HeatGauge依然用嚟俾各種特殊操作消耗，類似超必嘅DistortionDrive只扣全滿值嘅50%，換言之儲滿晒條Bar，玩家嘅戰術彈性就會好大。同《Guilty》一樣，《Blazblue》可以啟動強力防禦Barrier（扣防禦計）、防守反擊CounterAssault（扣50%氣）和RapidCancel（都係扣50%氣）等，之前玩慣嘅朋友應該唔難上手，而最特別係佢比以前更強調以攻代守，龜得耐擋得多就會減低攻守平衡，被人谷爆BarrierCrash會即時陷入無擋格狀態，任人魚肉、九死一生。
絕對和風港迷必受
《Blazblue》貫徹大Sell東洋口味，每個角色不論畫風抑或攻擊方法都似足《Guilty》咁動畫味重，打機似睇卡通！場景設計仔細到飛起，仲會受角色動作影響，做出互動如地震及煙霧等效果；唯一缺點係只有12個角色，以呢代主機嚟講未免少咗啲。同街機版720p相比，家用版可支援最高1080p輸出，而佢亦係XB360第二款全高清格鬥遊戲，所有動作效果快得嚟唔覺跳格，配合埋5.1聲道真係正過落街入大餅打啦！
6人連線開房挑機
除基本街機模式、故事模式、單機對戰和訓練模式外，還追加了街機要入秘技先開到嘅鬥高分模式。與此同時，喺呢個年代網上對戰絕對唔少得，畀機會大家玩完《街霸》再好好利用支棍，而且唔止可以一對一咁挑機，玩家仲可以開間房招呼最多6人同時參加，似足街機高手對決時企喺旁邊偷師。
順帶一提，《Blazblue》已獲日本格鬥遊戲大賽「鬥劇」列為比賽項目，同《街霸4》等名作一齊舉行猶如奧運會嘅賽事，可以平起平坐證明佢絕對唔係三四線廢Game。另外，香港行版更喺日英雙語之外再加上中文字幕，等大家睇得明故事講乜，抵讚！
Profile
機種：XB360/PS3
開發：ArcSystem
Works
類型：FIG
價格：約$299
發售日期：6月25日
