曾聽過高皓正Zac同范萱蔚Percy《為寂寞拍拖》，今日仲見到兩個人同車斷正，仲……震到坼天！即時衝埋去影相，點知佢哋大方望鏡頭唔使匿，咦，手上一人一支咪？做咩？齊齊唱K？喺車入面唱K？係咪講笑？吓，仲話要揸住呢部SERENAK-Box，跑去鬧市唱到街知巷聞㖭呀！
記者：梁美甜
攝影：譚盈傑
范萱蔚髮型化裝：Hair：JoveShek@Lobbyhairdressing/Stylist：BiR:DTse
Check真啲 唱K裝備
日產代理剛推出全港限量5部特別版SERENAK-Box，車身配備先進高級卡拉OK音響系統附中排頂置彩色顯示屏，簡單講句，即係有「芒」有咪有靚音樂，入隻碟就可以即時開Concert唱個夠。為咗試吓呢部SERENAK-Box，我哋請來兩位唱得玩得音樂人Zac同埋Percy又唱又玩，先來個鬧市街頭賣唱試音響，再移師僻靜地方匿埋唱，睇睇車內唱K咪係可以放肆唱到盡呢？
街頭唱全街震呆
唔係情侶嗌交亦非打情罵俏，而係Zac同Percy兩個大細路揸住咪喺路邊大聲唱自家新歌同派台歌。一開聲，無誇張，全街呆咗！車上配置嘅咪同音響竟然可以勁到響徹街頭巷尾！隨之而來就係笑聲同注目禮，緊接就係相機、手機狂閃，場面哄動。最搞笑係連小朋友都跑來同Zac、Percy搶咪唱歌，不過二人異口同聲：「好似賣唱咁！」邊有人賣唱賣得咁開心兼同班街坊打成一片㗎，或者好似Zac所言：「雖然係旺角街頭，但一啲都唔覺得突兀，感覺仲好自然！」見Percy全場笑個唔停，應該話好好玩至真！
匿埋唱嘆過K房
SERENAK-Box基本上同部齊料SERENA一樣，雙電趟門、免匙系統、後泊鏡頭、防水料座椅、ION空氣淨化冷氣系統等等，K-Box限量版本則多套卡拉OK音響系統及中排頂置「芒」。放平中排座椅加上SERENA出名闊落大內櫳，猶如超大超舒服梳化床，K房無得比啦。兩個大細路一見到就話：「正！」上車更即時閂埋門勁唱。喺鬧市，只要顯示音量嘅刻度達30，車外就開始聽到，只係幾難聽得清佢哋唱乜。但係轉場到空曠地方，相同聲量車廂外都聽得一清二楚，不過佢哋一樣越唱越起勁，Zac話音效拍得住真正卡拉OKBox！我就話支咪完全無發出刺耳響聲嘅情況，最正。
要款要環保
講到揀車要求，Percy話：「型嘅Hummer又或者可愛嘅甲蟲吖！」明顯Percy揀車重外觀。「人大咗想換部成熟啲、比較環保而又低車身嘅車，我又鍾意靜，Prius都幾好，啱我性格又可以對環境做番啲嘢。」Zac認真道來。計落SERENA得政府認同為環保車而減稅，加埋大包圍外形都叫有台型唔失禮，K-Box仲配置唱K功能，應該啱晒歌星身份嘅佢哋！
NissanSERENAK-Box規格
引擎：1,997cc直四CVTC
馬力：137ps/5,200rpm
扭力：20.4kgm/4,400rpm
傳動：XtronicCVT無段變速自動波
優惠價：$248,800（限量5部）
查詢：合誠汽車（22621088）
