螯游

你無睇錯，真係養龍蝦！
龍蝦又叫螯，在水族界──特別在香港飼養的螯，一般體積細小，水族迷看到，是不會產生食慾的。最細小的螯叫迷螯，BB時期與水晶蝦一樣大小，驟眼看分不出來，再細看，只是多了強而有力的前箝。據水の園老闆Jackie講，水族迷玩螯也是這兩年間的事，玩家有兩種，一是水族初哥，因為螯對水質要求不算高，簡單器材就可開缸；二是高手玩品種，像今日主角曼寧螯蝦，是螯當中的極品，出$5,000老闆才會考慮割愛！

記者：何兆彬
攝影：伍慶泉

夢幻蝦種

位於旺角魚街樓上舖的水の園，專攻水晶蝦，舖內有一缸錦蝦，成蝦隻隻過萬，由於水質要求甚高，出名難玩。相對來說，老闆Jackie說養螯實在易得多，淡水龍蝦一般要求鹼性水質，pH值約7，而水質硬度則較高，像曼寧一缸gH值約8-12。於是，養水晶蝦要用水草泥，但養龍蝦，魚缸鋪上一層石仔就搞掂，過濾仲簡單，打一兩隻水妖（氣泵式過濾）就已經足夠，毋須使用濾桶。
Jackie售賣十多種螯，部份寫「迷螯」，亦有寫「螯蝦」，點分先？
「迷螯一般只有2.8cm-4cm，Size較細，可以與靚水草一起養；而中型的叫螯蝦，約4cm以上，由於體型較大，會吃草。」原來迷螯的迷，即迷你，清楚明白。
玩螯與養其他蝦一樣，講品種，事關不同品種的螯放一起亦會交配，但雜種的後代，顏色並不鮮明。
初看曼寧，不明白何解價值五千個大洋，再細看其他品種，比較一下當堂明白了，它色彩多，細節靚，睇睇吓覺得它像高達系列的潛水機械人型號，有型！「曼寧屬於養螯的夢幻品種，被稱色彩惡魔。在香港飼養數量較少，我之前返過一次曼寧BB，只有指甲大小一隻，賣$980/對都瞬間被掃光了。」Jackie說：「據我所知香港未有人繁殖曼寧，這一對我是不打算賣，自己養來試試繁殖的。」與水晶蝦一樣，螯蝦亦是交配、然後抱卵、產子，但玩水晶蝦近親繁殖會出靚蝦，養螯則不同，近親繁殖後第二代（即水族迷稱的F2）則會開始褪色，並有可能失去生殖能力，這個時候，就需要另外尋找不同來源的同種蝦加入，下一代的螯又會恢復色彩。

■JackiePoon

德系橙螯$580/對

蘇菲亞迷螯（藍版）$380/對

隻隻都係笛子魔童

曼寧相貌出眾，固然出色易認，其他螯的特色又如何？原來欣賞的重點，一是蝦頭有沒有噴點，二是蝦身有帶沒有帶，部份品種（例如哈帕斯）蝦身有雙帶，紋理特別。
螯這個字，其實是指龍蝦的那雙箝，此對寶貝既用作打交，又用來覓食。採訪當日看見Jackie以蘋果螺餵蝦，他說：「一般螯都係餵乾糧，係曼寧呢啲大哥先餵螺咋，幾蚊一粒㗎！」咁畀得幾蚊粒，又多咗場「龍蝦拆螺肉」的戲肉欣賞，只見曼寧在碎石堆中挖呀挖，挖出一個陷入處做竇，就箝起一粒螺匿埋，硬箝一穿而入，滋味地吃起螺肉來了。Jackie魚缸上鋪上格仔板，再叠上兩粒石頭，他提醒大家，原來龍蝦最叻玩PrisonBreak，「試過樓下舖頭同我講樓梯見到隻死曱甴，但睇真又好似龍蝦，我一聽『死喇』，即刻去望一望，已經乾晒！」原來龍蝦最叻沿着喉管爬牆，萬一你飼養的是曼寧，數千大元變成蝦乾實在欲哭無淚。
至於打交，Jackie話對龍蝦來講基本上係等閒事，「佢哋全部都係笛子魔童，打甩咗箝、腳，全部都會生番。不過初生出來會變大細手，要多蛻幾次殼才會平衡番。」