同事C往澳洲公幹，在MSN上大呻物價貴：「返大陸買支汽水3蚊，呢度都係3蚊──澳幣呀！」乘一乘，大概港幣15元上下，我好想回應，阿姐，你知甚麼叫貴嗎？本小姐坐緊郵輪，一罐可樂都要3歐元喇！但我最終沒有回，因為船上上網仲貴，基本價每小時20歐元，正是一寸光陰一寸金，匆匆send過稿後，還要嗱嗱臨按logout，慳得一分鐘得一分鐘。
沒有互聯網，日子怎麼過？就是以珍惜心態閱讀每一份刊物，床頭本《LonelyPlanet》，我開始懂得背了，最近嗜好是讀郵輪雜誌，即是那本每晚攝入門罅、A4尺寸兩版雙面印刷的東西，告訴你每天的船上活動、餐廳開放時間、晚餐dresscode等。正常人瞄兩眼就放下，我卻逐格逐格細閱，甚至每日會期待出版時間。船上雜誌，只是廣告一種，但在北歐寂靜的海面、電話接收零格的局面，能透過幾版紙，知道船上有人為你每天的娛樂而努力，已經夠感動。再說，雜誌會把船上節目包裝到「勁抵」，博你望一望，今日無人買，聽日再平啲！跟貼每日優惠走勢，對我而言，有追看連續劇的快感。
來看看今天的精采優惠是甚麼？「髮廊大特惠，洗頭恤髮原價37，特價25！（歐元）」
記者：劉嘉蕙