熱刺同紐卡素平時買買埋埋一大堆唔等使嘅球星，搞到隊波鬼咁浮誇，但係成績就欠奉，嚟到夏天梗係要清吓啲倉底貨啦！聽聞熱刺領隊哈利列納講明要送14個球員上斷頭台，而紐記仲誇張，據報得3個球員可以留低，其餘一律要out，睇嚟下屆兩隊都面目全非。
熱刺講到明踢走14猛將
熱刺陣中粒粒星，淨係賓尼、柏夫里約真高同埋戴倫賓特3個加埋就使咗佢哋4,780萬鎊（約6.1億港元），但係哈利列納覺得佢哋得個名夠響，對球隊全無作用，已下令將佢哋踢出白鹿徑，咁又係，你睇佢哋喺上屆英超得個第8，仲一個盃都攞唔到就知啦。咁都未算，贊拿斯、加里夫巴利同埋占邦達等11個球員亦唔符合哈利列納嘅要求，只要啱價錢就會賣。
查實哈利列納喺今年1月時使咗成5,000萬鎊簽入羅比堅尼等4名球員，而佢仲雄心壯志要喺新球季攞歐聯席位，若然唔趁夏天出貨套現，喺今夏邊度搵錢買新球員呀！之但係，英國傳媒同熱刺計過，佢哋喺過去兩年使咗成1.8億鎊簽新球員，但喺賣出嘅球員身上收番9,500萬鎊，所以佢哋今次清貨，我求大俠相信佢哋肯定蝕到入肉，賣到4,000萬鎊都算執到。
紐記僅3將有得留低
除咗熱刺，喺上屆英超護級失敗嘅紐卡素亦打算清走啲瘀血。紐記喺新球季要喺英冠比賽，但淨係人工都成7,000萬鎊一季，佢哋班主艾殊利話自己無能為力，只好幫球會減磅。聽聞除咗龍門夏柏、後衞史提芬泰萊同埋中場畢特係非賣品之外，其餘球員如奧雲、阿倫史密夫、巴桑同埋高洛仙尼等，只要有球會出到合理價錢就可以走人。問題係，佢哋班球員老傷病弱殘，唔係佢哋話肯賣就有人要。
最吹脹嘅係，艾殊利呢頭話冇錢，但轉個頭俾人踢爆佢喺電影《一球成名》第3集，投資300萬鎊等自己有份出鏡同埋有一句講粗口嘅對白。份人咁蠱惑，唔怪得知紐記啲球迷咁討厭佢啦！