【橫店直擊】43歲的劉嘉玲去年7月與梁朝偉結婚後求子心切，日前更表示要向上天申請BB，今次她絕非齋噏，決意落實生育大計。昨日嘉玲聯同劉德華在橫店出席新片《狄仁傑之通天帝國》記者會時，在片中飾演霸氣武則天的她直言完成手頭片約後，便叠埋心水在8月底閉關造人。嘉玲恨生仔大過天，難怪早前她會以「形象不合」為由，將價值2,000萬元的衞生巾廣告拒諸門外。
劉嘉玲和梁朝偉結婚快滿周年，其間經常傳出女方四出尋求生仔秘方，事實上嘉玲已屆43歲，偉仔也46歲，兩人渴望早日為人父母，嘉玲更三番四次開到聲恨生BB，昨日她和劉德華及李冰冰現身橫店一間酒店，出席徐克新片《狄仁傑之通天帝國》記者會時，再度表明生仔決心，誓言8月底展開造人大計。
推2000萬衞生巾廣告
昨日嘉玲身穿一襲Prada裙，豐滿身材若隱若現，性感搶鏡。近日嘉玲頻頻曝光，接job不絕，更有消息指有內地廣告商開出2,000萬天價邀她拍衞生巾廣告，但因合約要求她一年內不可懷孕，故嘉玲只好推掉，她昨日回應說：「係有人搵過我拍，真係有傾過，但係條件同錢未傾已否決，形象唔係好啱，同埋我手上有其他廣告代言，唔想影響其他廣告。」
同偉仔有共識唔探班
嘉玲與已育有兩女的王菲份屬好友，日前有內地消息指王菲催她早日生育，嘉玲笑稱是誤會，催她生仔的是林青霞才真，她說：「催嘅係青霞，唔係王菲，王菲冇催我。」種種迹象顯示嘉玲已準備好做媽咪，她直認說：「要拍完戲先，係都8月尾先開始造人。」今日嘉玲將為《狄》片的武則天角色試造型，稍後正式開工，拍攝為期一個半月，完成後會再偕過氣緋聞男友胡軍合演關錦鵬新片《用心跳》，之後便籌備生仔，故嘉玲暗示將減產，她說：「唔會接咁多戲啦，主要睇角色同劇本，唔會太注重產量。」
接下來的一個多月，嘉玲會在內地拍戲。有傳因偉仔和華仔不和，故不會探嘉玲班，嘉玲昨日說：「偉仔係冇嚟探班，我同偉仔有共識，永遠唔會探對方嘅班，因為唔想影響大家對角色嘅投入情緒啫。」日前傳出嘉玲為《狄》片學騎馬時兩度墮馬，她說：「之前我拍電視劇拍過騎馬，好多時要用替身，呢次我自己上陣，練咗6、7日，劇組準備隻老馬畀我，因為脾氣冇咁大，到正式拍攝時會畀隻高大靚仔嘅馬我㗎啦。」她又謂要揣摩演武則天的情緒，指角色雖霸道，但也有柔情的一面。
至於在片中飾演狄仁傑的劉德華，昨日被問到有關他嫌拍該片的動作戲太辛苦而搵替身的報道時，他說：「牛華呢個名唔係一朝一夕，導演講過叫我釋懷，唔好理咁多。導演同片商搵我，覺得係一個票房保證，所以我拍乜嘢都盡力。呢套戲嘅角色係用腦嘅人，本來可以唔使動作，但導演同片商要照顧外地市場，有動作會更加好睇，成套戲有三分一都係動作，我嘅本份係盡力拍好。」更向記者展示手背及肩膊的傷痕。
華仔呻黐長鬚好辛苦
華仔又指徐克曾多次邀他合作，這次終可結片緣，他說：「過去10年8年佢都有搵我拍，但當時主要係拍中國星同東亞嘅片，今時今日同徐克再合作，家自己比較自由，冇乜片約限制。」
華仔笑謂曾跟徐克表示他可拍007電影，沒想到徐克真的開拍集007、柯南和福爾摩斯於一身的《狄》片，故華仔二話不說接演，但事先聲明不戴頭套，華仔說：「因為戴頭套唔靚，真髮可以駁長，點知戲中要黐長鬚，仲辛苦，講嘢動作冇咁自然，食嘢又食唔到。」
採訪、攝影：曾小嘉
話你知：徐克打造中國版魔戒
由劉德華和劉嘉玲主演的新片《狄仁傑之通天帝國》，開拍近一個月，其概念設計圖日前曝光，據悉導演徐克有意大玩視覺效果，將新片打造成中國版《魔戒傳奇》（LordoftheRings）。
而《狄》片以唐朝名宰相狄仁傑的生平為主幹，狄仁傑生於官宦之家，是當時中國的一流大法官，且文武全才，辦案從不徇私枉法，為捍衞法律更敢於犯上直諫，故深受武則天器重。狄仁傑是我國家喻戶曉的歷史人物，就連已故荷蘭漢學家高羅佩（RobertHansvanGulik）也曾將有關狄仁傑的小說《狄公案》，繙譯成英語版本，後來更創作一系列推理小說，令狄仁傑變成中國版福爾摩斯。
娛樂資料庫：高齡產婦遍娛圈
劉嘉玲宣佈於8月閉關全力造人，現年43歲的她屬高齡產婦，要承受的風險較高，不過娛樂圈的高齡產婦也為數不少。
陳慧珊
37歲的陳慧珊前年為丈夫鍾家鴻誕下女兒Mira，初嘗為人母親滋味。
吳君如
06年4月，當時40歲的吳君如為陳可辛誕下女兒Jillian。
林青霞
96年，當年42歲的青霞為丈夫邢李㷧誕下長女愛林，01年再誕下幼女言愛。
沈殿霞
87年，肥肥為鄭少秋誕下女兒欣宜，當時她41歲。
資料來源：《蘋果》資料室