香港成日話搞創意產業，西九龍話建設成為藝術區，北九龍裁判法院舊址會演化成為美國式設計學院，教育局宣傳在新學制下的視覺藝術科課程將一改過往側重「創作」嘅傳統，強調「創作」與「評賞」兼備。
講「評賞」，並非咁簡單，學生要讀吓中西藝術史，多啲去藝術博物館，仲要老師教導美學與鑑賞標準，唔係話咁易。藝術B教過好多年藝術史、油畫、設計等等，年年都為學生發愁，唔知點樣拉佢哋「上樹」。佢話以前有一間中學自中一開始已教藝術史，帶學生參觀畫展，故此學生嘅評賞底子唔錯。但那是以前噃，並非現在！
最近有人話畀左丁山聽，有賽馬會體藝中學校友發起，要求母校注重傳統藝術教育，不要放棄。點解呀？聽講在三三四學制下，體藝中學比較強調「四加二」即四科必修科，中英數通識之外，加多兩科，或有叻學生可以「四加三」，咁搞法，即係學生被迫放棄選修藝術科，理科生必選物理化學生物電腦之類。文科生選地理歷史西史之類，希望爭取入大學其他系吖嘛！選修藝術科可能只會佔少數
呢間體藝中學據講係尤德爵士與夫人嘅構思，得到馬會大力支持撥款興建校舍，校內藝術課室特多，當年由教育署負責藝術教育嘅楊懷奉（楊懷康阿哥）負責，為咗建立一流藝術教學，楊老兄到外國搜購最新設備。有人曾經講過：「體藝中學入面嘅studio設備，可能靚過中文大學藝術系！」好嘞，學校建成後，馬會又交低幾千萬元辦學基金，畀校董會運用，當年藝術界人士對之寄予厚望，張灼祥係創校校長，更有鴻圖大志㖭。
哎吔吔，轉眼二十年，體藝中學傳聞不再重視體藝，要變身成為一間普通英文中學，與沙田區內名校競爭。孫明揚局長唔知會唔會打個電話去問一聲：「曾特首猛咁推動創意產業，你哋唔好放棄藝術噃！」呢間學校的藝術科成績好巴閉，據教育界人士講，會考藝術科與高考藝術科之優良級，該校學生佔咗五成以上。不過，學校校董會可能有唔同睇法，認為會考整體成績要緊，體育藝術第二，辦傳統文法中學勝於辦體藝。馬會啲錢好易使嘅，取之無妨。