坊間的Playgroup越開越多,最初不外乎唱歌跳舞,現時則多了專門主題。劍擊全方位約半年前開設全港首個3-5歲幼兒劍擊Playgroup,教練全是現役或退役港隊劍擊運動員,訓練幼童手眼腳協調及專注力和耐性等。跟一般修讀完課程便可升級不同,每個階段都要有良好成績才能升階,更可由3歲一條龍學到18歲。
記者:林佩婷
攝影:楊錦文
非玩玩吓考試升班
劍擊全方位資深教練阮浩然指出,從前最小都收小學生,開Playgroup全因機緣巧合。「其實一路都有家長打嚟問,後嚟有位教練帶囡囡上Playgroup,發覺呢樣嘢原來已經好普及,所以就開設劍擊Playgroup課程。我哋同普通Playgroup最大分別係唔會讀完就進階,當中又分三個Level,每個Level最後一堂會有個小測試,成績好先可以升Level,方便佢哋將來加入小學組班別,繼續學落去。Level1主要係訓練手、腳、眼協調同紀律;Level2開始學步法,如弓步或手腕轉移等;到Level3就可以着晒保護衣同同學對賽練習,從實戰中吸收有關知識。」
遊戲授課舞膠劍
為令小朋友更易學習,這裏還融入了很多遊戲及玩具。「小朋友唔同大人,容易明白指令或動作,所以我哋諗咗好多遊戲,用嚟教佢哋技術,好似教用劍拮膠波,感覺如幼童玩波仔,又或將英文字母地墊貼喺牆上叫佢哋拮。而且劍擊適合所有小朋友,因為可以訓練四肢協調外,仲可以令佢哋變得冷靜同有紀律,增加決斷力。」
裝備方面,為免小朋友怕俾劍拮親唔肯玩,保護衣會比較厚。「佢哋用嘅膠劍亦特別從外國訂返嚟,劍身較短同輕。雖然係Playgroup,但比賽時候一樣有插電位顯示邊一方拮中,同分析點樣得分。當然佢哋唔識分拮邊啲位,所以只要拮中就OK。到6歲以上先會用番正常裝備玩真劍,保護衣外會加番件金屬衣,教佢哋攞分正確範圍。」
嘉譽(4歲)
「囝囝學咗差不多半年,最初超驚青,但上完後專注力變好。」
祺祺(5歲)
「學咗一年,由最初單人教授到上Playgroup,越學越要求完美。」
劍擊全方位
以季度劃分PlaygroupLevel,每季最後一堂會進行測試,達到要求就可以升班。完成Playgroup三季課程後,通過測試就可加入小學組低班或中班。
對象:3-5歲
人數:4-8人
堂數:1季16堂(每堂1小時)
時間:待議
費用:
1季$2,816(16堂全數繳交)
半季$1,584(8堂全數)
每月$880(4堂)
地址:尖沙嘴寶勒巷金帝行3樓
查詢:23886319