世衞或將H1N1豬流感疫情級別提升至最高的6級，刺激醫藥股引發一陣急升，不過呢輪無跟開相關股份，何必勉強自己跟風高追？內銀股仍見強勢，而被視為後市指標之一的港交所（388）升穿130元，估計港股後市將有突破，目標約2萬點左右。
家陣入市唔似前排乜都可以炒一餐，因為唔少股份今個浪累升唔少，高追風險漸增，星俠最近多番建議散戶手上持股有利潤就不妨食糊，如果感覺唔對路，更要當機立斷跳車。
深高速候低翻兜
深高速（548）早前向路勁基建（1098）收購機荷高速東段45%股權，由於內地經濟漸見好轉，其收購亦有助未來公司盈利，故消息公佈後刺激股價飛升，昨一度升至4.44元，收市報4.29元，升2.1%。估計短期高位已見，建議有糊要食，想買就吼3.80元至4元水平出手。
家陣入市有乜選擇？尚未認真炒過之半新股有木薯資源（841），股價表現落後大市，如果升浪發動，有機會衝破上市至今高位1.66元，不妨留意。
方星俠