豬流感全球擴散,啱啱喺美國返嚟嘅田二少好彩冇中招,否則身為公益金名譽副主席嘅佢都要被隔離,上星期六唔可以參加無綫嘅「萬眾同心公益金」,同細契菊姐大跳chacha。
表演前田二少花咗唔少時間去練習,更向好友廣發英雄帖,請大家多多益善捐吓錢,佢話多位男拔萃校友都響應,可惜當日電視畫面所見,顯示捐款者大多數係知名人士、大公司,包括小小超、新世界同新鴻基地產等,校友卻榜上無名,田二少對此都覺得唔好意思,但相信老友施恩不望報,唔會介意。
田二少舞技如何大家有眼睇,佢則話畫面打出捐款人名單唔係幾好,因為好多人只顧睇邊個捐錢,冇人留意佢舞姿。