轆Book：與300部Benz同眠

若然喺二十年前周圍問人：「咩牌子係名貴房車？」相信唔熟車嘅師奶都識答：「Benz」。名牌房車形象根深柢固嘅Benz，當年成為不少人發奮嘅目標，卻估不到會成為一個小朋友沉迷嘅對象。今年30出頭嘅Eric，從小就愛上Benz，擁有超過300架Benz模型車，揸嘅車亦都只揀Benz，不離不棄，誓守呢個一生至愛嘅品牌。

記者：許維雅
攝影：陳陶鈞

有300架模型車唔算多，但全部都係Benz、唔特別唔儲、手工唔靚唔儲，大部份珍藏更係搵人幫佢由德國訂返嚟，架架都係絕版經典先叫人佩服。

■300架模型當中以九十年代車款居多。

沉迷190EEVO

「細細個已經開始鍾意Benz，可能受屋企人影響，因為細個時爸爸都係揸Benz。跟住就慢慢變成逢有Benz嘅嘢都睇，同細佬一齊沉迷德國房車賽。」難怪一打開Eric嘅珍藏大櫃，最多嘅模型都係落場賽車。「大概93年開始儲，特別沉迷190EEVO，我差不多有齊咁多款。除咗睇比賽留意車款，仲會睇雜誌，我又鍾意儲啲特別版或者落場車，但香港好少有舖頭會入，所以更難搵。多數都係相識模型舖幫我由德國Minichamps訂返嚟，或者搵朋友去德國買。自己19歲去德國出trip時，一有時間就去搵啲模型舖仔掃貨。」作為記者，見到件件珍藏，明知無答案都忍唔住問總共買咗幾多錢。「總共幾多真係唔會計，但就記得以前買1:43大概兩百幾蚊一架，家要三百至四百蚊。」男人買嘢，用幾多錢未必上心，但保唔保值，有無升值能力，總會略知一二，「真正升幾多就唔知，不過近年都有上網Bid啲舊模型，91年出嘅車仔都升到過千蚊一架。」

■全球限量2,500套，拉花圖案跟當年Benz真車零件盒相同，係穩佔Eric床頭位置嘅至愛。

■落場車外，收藏品中仲有唔少珍品貨櫃車。

■Benz拖頭仔好似《變形金剛》，好可愛。

■創辦人CarlBenz特別版貨櫃極具收藏價值。

舊車一樣炒得起

用「出世到家都係鍾意Benz」來形容自己，18歲當然第一時間考牌試揸，座駕亦順理成章係Benz，不過令人意外嘅係情況會極端成咁，「我都曾經有嘗試過其他牌子嘅車，但結果真係買唔落手，其他車硬係無咁舒服，所以代步車一定要係Benz。」無論儲嘅同揸嘅，Eric都偏好舊款型號，幾經辛苦先搵到架九十年代嘅SL500舊版開篷同03年E-Class旅行車，「舊款有味道啲，我就係鍾意佢四四方方，我等緊呢架SL500升值，八十年代出嘅已經升咗。至於Benz旅行車喺香港得好少，感覺罕有啲。」同佢鍾意儲限量版模型車嘅心態如出一轍，咁呢啲算唔算大隻咗嘅限量版呢？

■限量1606套嘅DTMBoxSet，盒內有第772套嘅標記。

■80年尾生產嘅190EEVO賽車，家升值四至五倍。

■第39屆澳門格蘭披治房車賽，兩架由仁孚Sponsor嘅落場賽車。

■1954年嘅300SLR，1:12嘅灰色跑車。

■1926年ModelK，手工極為精細。