港股走勢有驚無險，但明顯飄忽不定，投資者對任何可以影響股價嘅消息都絕對敏感，港府一宣佈全港幼稚園及小學停課兩周，啲爸爸媽媽已經趕住入多啲維他命C股，中國製藥（1093）就擺明屬於條件反射型，港人最緊要唔好執輸。
無論大中小股，近期圖表派信徒都應該唔難賺錢，只要有成交配合突破前一日頂部，即意味資金埋位。至於大市方面，把2007年31958點恒生指數大頂與去年10月大底10676點相減，反彈呢個跌幅的0.382倍黃金比率，就係好多人牛咁眼睇實嘅18805點，假如成功破位，進一步挑戰跌幅0.5，就係21317點，至於終極目標0.618，就係23828點。雖然好似好易計出嚟，睇埋經濟數據又未必覺得好可信，不過基於NothingisImpossible，擺定袋裏面PlanA、PlanB靈活應變可也，如果唔執生，好難應付呢個乍暖還寒嘅市勢。
資金威力不能睇小
大市每每轉危為安，主因係環球資金經過篩選與取捨後，發現香港既自由，而且在聯滙之下唔擔心香港會亂印銀紙，加上債券與存款回報偏低，自然要為錢財尋找出路。歐美量化寬鬆亂印銀紙，Cashisking失去市場，資金氾濫成災的結果，是買金融資產對冲未來可能出現之超級通脹。
以現水平計，可以獲大行重新估值及上調評級的股份，相信應已完成得七七八八，要再炒上總要找個原因，當正復蘇咁炒，或者炒最壞情況已經過去，係最名正言順理直氣壯嘅理由。你可以唔相信會咁快復蘇，但唔可以睇小資金嘅威力。不過股樓齊鳴嘅日子可以玩幾耐，端視一個「息」字，金融資產通脹未能啟動宏觀經濟通脹，聯儲局對這種局部失衡式膨脹的態度，以及往後息口的部署，仍然值得關注。
用一個資產泡沫包圍信貸泡沫，再爆下去已不知可以用甚麼方式補救，尤其是大家已慣性不務正業以炒為事業。傳統基金被動地遭對冲基金挾倉焗賭之餘，也不會按以往牌理出牌，要勝利大逃亡也不必等月結季結半年結，連佢哋都一邊買貨一邊計數、且戰且退，我哋只好驚住嚟炒、炒住嚟驚。
胡孟青