名校女生交叉感染豬流感，雖然有疫情嘅係中學，不過政府卻宣佈小學、幼稚園今日起停課，搞到好多家長、學生十分混淆，六神無主幾乎瞓唔着，教育局中人透露，近日好多家長喺政府網上電話簿搵到該局新聞組電話，紛紛致電查詢停課安排，近兩日雖冇正式紀錄，大大話話都有幾十個市民查詢。
「早啲瞓睇特首宣佈」
政府部門新聞組主要回應傳媒查詢，驟變停課熱線，令新聞主任應接不暇，據講家長來電主要詢問考試會唔會受影響、停課詳細安排等，而小學生打電話去教育局，梗係唔係問功課，多數係好緊張追問使唔使返學，可惜前晚政府未能作出任何公佈，惟有同佢哋講早唞：「小朋友，你早啲瞓啦，睇特首宣佈啦。」
前晚教育局對是否停課封口，教育局局長孫公都唔話得事即時宣佈停課，要學生返多一日學，多一日感染機會，係因為煲呔去咗廣西，所以就算預計到嗰班女學生已交叉感染，其他局長都唔可以貿貿然宣佈停課或其他抗疫措施，總之一切要煲呔返回香港先講。
上次港府果斷封維景阻止疫情擴散，整個政府以至煲呔民望谷底反彈，正所謂食過翻尋味，煲呔因為六四「扮代表」言論成為人民公敵，民望打回原形，正苦思如何在7.1前重振民望，減少市民上街意欲之際，忽然出現本土豬流感個案，佢當然要十萬火急趕回來攞分。
既然煲呔要搶攻，其他局長自當識做，總之功勞盡歸煲呔，功由佢領，鑊就唔孭，因此八方認為全港家長學生唔好再打電話到教育局嘞，事關孫公都唔會畀到答案你哋，孫公不代表煲呔，有乜事聯絡特首辦應該更快趣直接得到權威資料。
煲呔想翻啅豬流感攞分都唔係實食冇黐牙，上次封維景，一般市民不受影響，人人拍爛手掌，今次停課卻令家長、學校、老師好多怨言，因為考試、放暑假安排亂晒龍，煲呔民望不容樂觀。
mailto:[email protected]