股價彈番上1蚊樓上嘅中國風電（182），噚日公佈兩個主要職位變動，股壇名人高振順辭職唔做公司主席，轉為副主席，主席個位就交畀原本做開行政總裁嘅劉順興兼任，有關變動已經喺本月10日生效。大風一吹，高振順即時同劉順興調咗位。
公司通告解釋，自06年12月起出任主席嘅高生，其中一個功勞係促使公司成功進行債務重組。通告話高生作為主席，帶領中國風電由做開參茸產品銷售嘅南北行，轉型做風力發電，到家業務有番咁上下，認為係時候退任喎。不過，佢仍然留低做執董。
翻查聯交所資料，唔計認股權，高生仲揸住大約20億股中國風電，按噚日收市價1.02元計，大約值20.4億元，睇嚟高生都好信得過劉順興噃。