獨家新聞、精采新聞相片從來不是唾手可得，全靠記者走到最前，先可以為讀者帶來真相。亞洲出版業協會舉辦嘅「2009年度卓越新聞獎」頒獎禮噚晚舉行，八方多位同事獲獎，恭喜佢哋同其他行家獲得殊榮。
肥佬黎做主講嘉賓
去年轟動一時嘅鳳姐連環被殺案，警方先拘捕一名巴裔男子，不過《蘋果》記者發現警方鎖定港島殺妓案兇手另有其人，《蘋果》發掘呢單獨家新聞嘅過程，全程跟貼警方追兇進度，獲得突發新聞優異獎。
西方掀起金融海嘯，香港人初時隔岸觀火，但瞬間水浸眼眉，買咗雷曼迷債嘅小投資者，過去大半年上街無數次，《蘋果》攝記將佢哋四出求助過程記錄落嚟，取得攝影大獎，寫下國際金融都會散戶血淚史。攝記李家皓則憑一幅上環水浸特寫相片取得優異獎。
漫畫家尊子作品《等你一票》獲頒漫畫優異獎，《蘋果》美術組解構四川豆腐渣工程，獲頒資訊圖像大獎；台灣《蘋果日報》得報章設計優異獎。壹傳媒創辦人黎智英噚晚做頒獎禮主講嘉賓，在場人士問佢何解《蘋果》6月5日以李澤楷做老竇做頭條而唔係六四燭光集會，肥佬黎否認，指當天報道燭光集會篇幅多好多。
肥佬黎又指未來出版業必須融合影像、動畫及文字方有出路，佢選擇在台灣搞電視台，係因為相信當地係電視製作中心，出品可覆蓋大中華及全球華人。
得獎作品
