周國賢和張繼聰已為人父，他們將於本月20日舉行慈善嘉年華會暨音樂會，並打算帶同兒女玩足一天享受家庭樂順道慶祝父親節。張繼聰笑言打算趁機對親家，讓愛兒張瞻與周國賢的兩個女兒相睇。
已為人父的歌手周國賢、張繼聰，今年打算不單與家人慶祝父親節，實行與眾同樂。他們於本月20日在數碼港舉行「好爸爸音樂會」，同日嘉年華會後再有音樂表演，門券收益撥捐匡智會。
親子音樂會
張繼聰日前說：「我哋特別揀草地舉行，喺現場我哋安排咗好多細路仔鍾意玩嘅吹氣滑梯、爆谷、賽車仔等，大人帶埋小朋友嚟玩，等佢哋可以一齊有個愉快周末，大人仲可以身作則，教小朋友做善事。同日我哋仲有個音樂會，到時會同匡智會嘅小朋友一齊jam歌，佢哋雖然得十幾歲，但jamBeyond嘅歌都好rock㗎！」
就算工作再忙，周國賢也堅持周日是家庭日，他表示會帶兩女兒出席，他說：「星期日一定係家庭日，幾忙都要放低工作，細路大得太快喇！我要一分一秒都好好珍惜。但係細女太嘈太百厭，我只會帶佢玩滑梯。」至於張繼聰希望太太謝安琪和兒子也能到場，他謂：「家同佢夾工作期表，盡量安排。平時同佢哋去公園玩，已經覺得係珍品，爽過去日本。早排我錯過咗個仔屙呠呠（大便），屋企人講到好似太空船離地咁。」
兩家人相聚
貪玩的張繼聰更笑言今次有機會對親家，周國賢解釋：「佢個仔好鍾意我大女，但係細女出咗世，或者會轉為鍾意細女。」張繼聰也興奮地說：「大家平時好忙，又住得遠，唔係成日見，今次好難得兩家人聚埋一齊，做到親家都幾搞笑。」
採訪：王連連
攝影：葉君海、彭琮然
化妝：Pinky-ku
髮型：JobbyofHairpeace（張繼聰）
Evechiuofp.o.pHairdressing（周國賢）
場地提供：Quarters-GroupInnClub