蘋果公佈iPhone3GS消息，規格包括速度提升兩倍、支援拍片及剪輯Video等，身為AppleFans，梗係開心到瞓唔着啦！不過除咗粉絲失眠外，原來水貨舖頭一樣冇得瞓！
點解？咪就係舊嗰部iPhone3G減價囉！例如8GB版本，香港蘋果網頁就正式宣佈售價由原來$5,288插水至$4,288，激減$1,000；消息一出，Fans當然開心，不過Sales就非常擔心；9號當日，小記立即打電話問吓機場嗰邊有冇對策，點知水貨佬竟回答話，因為行機減價事出突然，結果仲未調整售價，即係話，9號當日水貨（$4,480）竟然係賣得貴過行貨。
市場資訊咁流通，醒目買家當然一早就腳䟴䟴等執平價行貨；但水貨佬亦唔慢，佢哋話會盡速調整售價，就粗略估計，不論8GB還是16GB，價售同樣會減$800左右，即實際售$3,680或$4,680，仍然比行貨便宜約$600。但究竟每一間水貨店實際街價係點？趁個市咁亂，大家不如行吓先達逐間格一格價，話唔定真係執到平貨㗎！