人浮於事，政府帶頭創造就業機會，指令各部門請多啲大學暑期實習生，稅務局、律政司、規劃署等部門都好識做紛紛請人，人工都唔錯，月薪有5,600蚊至7,000蚊不等；不過，同樣請暑期工嘅房屋署就好縮骨，話家仲未定到人工喎。
房署喺網頁登咗個廣告，話會請21個實習生，實習期二至三個月，工作範圍包括測量同數據分析等，不過就冇列出人工。八方致電房署查詢實習生有幾銀一個月，點知房署竟然話未定，只係指舊年有5,800蚊。請人卻未定人工，唔通請義工？工聯會王國興都嘖嘖稱奇，話聞所未聞有此等怪事，佢戲言房署可能想以海鮮價請人，見工時慢慢講價。