六四20周年，北京對所有涉及六四敏感嘢趕盡殺絕，神秘符號VIIV早前僥倖可以在天安門出現，再有人向八方報料，指近期喺北京赫然發現印有「人民不會忘記」嘅悼念六四貼紙！
印有紅花同白花
VIIV暗示六四，能逃過封殺不太奇怪，「人民不會忘記」貼紙明刀明槍，可以出現北京鬧市，甚至係屠城黑點木樨地出現，才真正令人驚奇，證明無論北京點樣封殺，大家始終毋忘六四。呢張貼紙雖然唔係好大張，但印有一朵紅花同一朵白花，疑似係「天安門母親」嘅標誌，雖然冇講明人民不會忘記乜嘢，不過係咁嘅日子貼上呢款貼紙，明眼人一睇就知係乜意思啦。
報料人指呢張貼紙喺木樨地站、北京火車站，同埋王府井書店附近街頭都有，六四英靈在天有靈，知道人民不會忘記他們，相信好安慰。北京限制「天安門母親」家屬出入、關閉墓園，甚至唔准大學師生着白衫，阻止外國傳媒採訪，諸多小動作都阻止唔到北京市民悼念六四。