淡友開心兩日之後，昨日失驚無神又被好友痛擊。外圍股市咁強勢，港股如果整固完，相信19000唔會係阻力。
市場資金未見流走，細價股雖然唔係隻隻郁，但內銀股及一眾國企爆發升浪，估計資金重新捕捉「正路」股份，散戶如果有睇住幾隻主力中資金融保險股，如中行（3988）及國壽（2628）等，都會見到以上股份醞釀爆發新升浪。由於國企股及金融股再領風騷，散戶短期入市不妨向該板塊入手。
工銀憧憬私有化
工銀亞洲（349）昨日升勢十分含蓄，僅升2.1%，收報14.10元，但中銀香港（2388）走勢卻勁得多，大升6.8%，收13.90元。
工銀亞洲自上月初升破13元之後，持續在高位徘徊，但期內沽壓不大，似乎係伺機再升格局，家陣股海焦點又回到金融股，而且近期唔少股份趁市旺搞私有化，工行（1398）私有化工銀亞洲之傳聞隨時會翻炒，有此憧憬，短期上望17元水平應無難度。
方星俠