家啲小朋友真係膽生毛，一個二個可以為幾百蚊唔怕死，向我哋啲的士佬開刀，打我哋啲同行主意。幾個妹揸把刀就學人搶，幾個細路赤手空拳又照搶，雖然兩個同行都叫做保得住啲血汗錢，但俾佢咁嚇一嚇都唔抵啦。所以我決定學吓其他同行咁，裝個閉路電視喺車度，仲可以唔止裝一個鏡頭，包影到車廂入面每一個角落。佢哋仲懶醒咁教我裝埋個GPS衞星定位系統，架車去到邊都知，唔怕俾人偷車咁話。其實裝呢啲嘢一啲都唔平，個衞星系統仲要每個月畀錢，我哋啲收入已經俾短加長減整走一大截啦，家仲要自費裝咁多嘢，真係百上加斤。計我話，使得咁多錢，最緊要係雞乸咁大隻字寫出嚟，等啲小賊仔知難而退。呢兩個牌放喺車頭之後，個個客上車都會八卦問吓，夠晒矚目！有同行直頭叫我整兩個畀佢，無錢裝系統擺個牌嚇吓人都好喎。我梗唔畀啦，自己呃自己，咁不如放個紙板警察喺車啦！
文：黃師傅