有「澳門李嘉誠」之稱嘅柯為湘老貓燒鬚，佢揸旗嘅九龍建業（034）好不幸咁炒燶咗Accumulator（累計認購期權），噚日佢出席股東會後，終於親身交代番呢單歷史（事隔半年有多）。佢話公司有兩項傳統業務，除咗地產發展，仲有金融投資，兩者過往幾年都增長得好快。簡單講，即係九建由始至終都冇脫離本業，跟某啲企業唔同囉！
柯為湘之後又援引例子，話有位精明嘅美國基金經理，喺金融海嘯之後到訪香江同佢訴苦，話晨早已預見到美國信貸危機，同過度消費會引起經濟重大調整，所以套現美國本土投資，捧住啲錢跑嚟亞洲搵機會，點知金融海嘯席捲全球，亞洲區一樣受重創。言下之意，指呢位芬佬唔夠精明，抑或係聰明反被聰明誤呢？
講到底，柯為湘認為最重要係吸取教訓。之但係代價認真不菲，慶幸九建股價最近走勢唔錯，件事亦告一段落，唔係啲股東又會走嚟訴苦。