金融海嘯來襲，傳媒行業係直接受打擊行業之一，八方做呢行，飽受嚴冬期滋味，好多行家唔好彩被裁員，好彩嘅都要減人工，分花紅更成為歷史名詞，加上傳媒自我審查情況似乎越來越嚴重，有見行業處於危急關頭，記協元老麥燕庭Mark姐決定重出江湖，角逐記協新一屆主席。
八方收到料，Mark姐已聯同參選副主席嘅岑亞志，以及10名行家組班參選，Mark姐在政綱寫明，當選後會企硬為行家爭取合理權益、捍衞新聞自由。記協改選平靜多年，今年忽然熱鬧，時事評論員黃世澤單拖角逐副主席，政綱之一係設立罷工基金。記協本周六舉行選舉答問會，有興趣者可捧場。記協會員不日會收到選票，可郵寄投票或於20日出席會員大會親身投票。