立法會流年不利,早前發生非禮案,又有豬扒飯被竊,噚日議事廳更流出第一滴血。呢單血染立法會事件冇搞出人命,真係不幸中之大幸,亦要多得兩個議員,其一係「法律超人」謝偉俊,佢見到樓上公眾席出事,保安員如臨大敵,第一時間衝到現場充當談判專家,成功勸服事主程先生。
兩醫生議員冷眼旁觀
雖然對方有刀,謝超人話冇考慮自身安全,「我諗住自己咁大隻,應該唔怕啩!」幾句說話就擺平暴力事件,謝超人話因為曾主持《法乎情》節目,同白姐姐開解過唔少聽眾心結,所以略懂游說技巧,面對呢啲場面都好淡定。
當謝超人做緊談判專家之際,衞生服務界議員李國麟及做過社工嘅李華明都抵達現場幫口游說,後來李國麟更做埋救護員,為程先生包紮傷口。李華明大讚李國麟動作純熟,三兩下手勢就止血紮上繃帶。李國麟係護士出身,佢話衝到現場只係「職業病」發作,唔好叫佢英雄。
立法會出現流血場面,主席曾鈺成同大部份議員都不知所措,兩位身為醫生嘅議員梁家騮、潘佩璆可能見慣呢啲受傷個案,表現十分冷靜,全程得個睇字。梁醫生同潘醫生都係公立醫院醫生,前者做外科,後者做老人科,程生係精神科病人,而呢單血案喺佢哋眼中可能屬小兒科,所以唔出手好合理。明愛醫院有辦你睇,去到醫院門口都未必救你㗎!
刀客闖入立法會,議事堂保安亮起紅燈,議員、官員坐立不安,恐怕下次會有人掟鏹水彈,有人指議員石禮謙同哨牙通好熟,不妨請佢幫忙種生基轉運。民協馮檢基認為要做足安檢,免得再有人持械生事,「如果佢入嚟箍住啲議員、官員,咁點算?」民建聯副主席劉江華表明唔會扮英雄,「我哋唔太適宜上公眾席,因為唔識自衞術。」該黨黃容根話君子不立危牆之下,如果保安措施冇改善,議員分分鐘做箭靶,所以佢已經同曾主席講咗,日後開會可能鞠個躬就走人,免得被人掟中遇襲喎。其實高官精通太極,政客又叻卸膊,個個身懷絕技行走江湖,區區一個刀男,何足懼哉!
mailto:[email protected]